om huis toe te gaan
(opgedra aan Diana Ferrus se pa)
om die veiligheid van jou huis
en klokkestemme van jou kroos
vir grofgeskut en loopgrawe te verruil
om oorlog toe te gaan
en as soldaat
tussen tenke en lyke te skuil -
wat 'n helstryd was dit nie …
laat hierdie kruis
my verbygaan
niemand streef
om ternouernood te leef
maar kyk, pa
jy hoef nie meer op vlug
te slaan -
oorlog hang nie meer
tussen son en horison
dit bly in aanhouding
want 'n halfeeu later
wandel vrede in stede
en systraatjies van die hart
om huis toe te gaan
met dié loutere vreugde -
jou lewe is gespaar
om huis toe te gaan
kinders op jou skoot te tel
en oorlogstories vertel -
dié droom kon jy bewaar
hoog op 'n toring in Aachen
©2010 Selwyn Milborrow
No comments:
Post a Comment