My hart was en is nog altyd by jongmense. In ‘n vorige rubriek het ek oor die onderwerp van oudword geskryf. Daarin noem ek dat oudword nie vir sissies is nie. Vandag wil ek ‘n stelling oor die jeug maak: Jeugbediening is nie vir sissies nie. Ek haal my hoed af vir Elandra Schovell, ‘n dinamiese jeugleier by Grace chapel.
Meer as twintig jaar gelede het ek as jeugleier ‘n onuitblusbare passie vir jongmense gehad. Nog steeds. Glo my, energie is ‘n groot lokaas vir jongmense. Sommige meen te veel volwassenes sê hulle is lief vir jongmense, maar toon geen energie wanneer hulle oor en met jongmense praat nie. ‘n Jongman wie ek onlangs by ‘n winkelsentrum hieroor uitgevra het, se boodskap is duidelik: “Bly weg van ons af as julle nie regtig begrip vir ons het nie. Die wêreld waarin julle as jongmense geleef het bestaan nie meer nie.” Sjoe, hier is ’n generasie wat nie bang is om te sê dat hulle voel, maar op ’n ander manier nie. Hulle is nie vaak nie, soos Pastoor John altyd sê. Hulle is bewus dat indien hulle nog in dieselfde moeilike omstandighede bly as hul ouers tydens die struggle-jare, dit dien as daaglikse herinnering om ’n aktiewe rol in die samelewing te speel. Hulle eie geskiedenis op hul eie terme te vorm. Dit herinner my aan vriend Vincent Oliphant wat hom sowat ‘n jaar gelede midde-in ‘n Menseregtedag-viering bevind het. Dié geleentheid het gefokus op kinders se siening van menseregte, spesifiek húl regte, in die konteks van ’n gewelddadige samelewing. Terwyl hy daar na die jongelinge sit en luister het, het hy begin wonder oor watter reg vir hom die belangrikste is. Hy kom toe tot die gevolgtrekking dat dit die reg is om te word wat hy veronderstel is om te wees.
In die boek van Handelinge 2:17 staan daar geskryf: “... Ek sal my Gees uitstort op alle mense: julle seuns en julle dogters sal as profete optree; julle jongmense sal gesigte sien...” Trouens, jongmense is dus volgens God die profete van ons tyd. Moet ons nie liewer aan hulle die geleentheid gun om diensbaar te wees? Moenie hulle veroordeel en etiketteer nie. Ja, daar is jongmense in wie ons baie gaan belê, maar wat ons gaan teleurstel. Mens kan hulle nie blameer nie aangesien daar by elke jeugdagsaamtrek grootmense soos die politici is wat oorvat en kompeteer om te sien wie die meeste clichés kan rondgooi. Slagspreuke soos “the youth is the future” en ander twak word op elke moontlike televisiekanaal uitgebasuin. Geen wonder die jongmense meen niemand verstaan hulle nie. Bly liewer weg van hulle af as jy nie regtig begrip vir hulle het nie.
Trouens, die pad waarin jongmense vandag loop is vol opdraande en afdraande. Die ouer generasie weet presies hoe dit voel: “Been there, done that, got the t-shirt.” Daar is ’n groeiende behoefte onder jongmense om gesprekke te voer met ander jongmense. Gee aan hulle die geleentheid om diensbaar te wees. Laat hulle dit op húl terme doen. Die boodskap aan grootmense is: Gee jongmense die ruimte om hul stem op hul eie unieke manier hoorbaar te maak. Die jeug moet net onthou dit gaan nie net oor waarheen jy gaan nadat jy sterf nie, dit gaan oor die wêreld wat jy agterlaat wanneer jy sterf. Ons nalatenskap is netso belangrik. Kyk maar gerus na die potensiaal wat die “klas van 1976” ons help skep het.
No comments:
Post a Comment