Mnr. Julius Malema sal die land later vandag vir die eerste keer as president van ‘n demokratiese Suid-Afrika toespreek. Meer as vier jaar se voorbereidings kom vandag tot volvoering wanneer Malema, ANC-leier, as Suid-Afrika se vyfde president ingehuldig word. Duisende Suid-Afrikaners sal van die Uniegebou se grasperke en nóg miljoene sal op televisie toekyk hoe Malema - agter koeëlvaste glas - in die amfiteater van die Uniegebou deur hoofregter John Hlophe as president beëdig word.
Sy inhuldiging kom presies vier jaar na die suksesvolle 2010 sokker wêreld-beker wat in Suid-Afrika gehou was. Die wêreld was geskok toe ‘n jubelende Malema en die AWB-leier, André Visagie saam met die Bafana-Bafana span die gesogte sokker trofee omhoog hou. Daar was nog ‘n skok toe ‘n minuut stilte gehou was vir Eugène Terre’Blanche, die ontslape leier van die Afrikaner-Weerstandsbeweging wat twee maande voor die toernooi op sy plaas vermoor is. Menige kenners meen dat dit die keerpunt in Malema se politieke loopbaan was. Oudpresident Jacob Zuma het na die finaal van die 2010 toernooi geskerts dat die Springbokke gerus vir Malema ‘n rugbytrui moet stuur aangesien hulle daardie geluksvoël gaan nodig hê. “Hy is ons nuwe Madiba,” het Zuma aan joernaliste gesê.
Voorbereidings vir Malema se inhuldiging het reeds vroeg vanoggend begin met sowat 900 mediaverteenwoordigers van oor die wêreld heen wat met busse na die Uniegebou aangery is. Daar word 34 staatshoofde en asook 6 000 eregaste verwag. Schabir Shaik, voormalige finansiële raadgewer van mnr. Jacob Zuma, wat in 2010 op mediese parool vrygelaat was, is nog onseker of hy sal bywoon aangesien daar steeds op ’n verslag van die korrektiewe toesig- en paroolraad raad gewag word. In ‘n versoeningsgebaar gaan Malema die BBC-joernalis, Jonah Fisher, wat hy in 2010 uit ‘n perskonferensie uitgejaag en hom ‘n “bliksem” en ‘n “bleddie agent” genoem het, as sy amptelike woordvoerder aanstel. In nog ‘n ongewone stap gaan oudpresident Nelson Mandela saam met sy vrou Graca Machel, ‘n spesiale toekenning aan Malema oorhandig vir die versoenende rol wat hy tot nou toe in die land gespeel het. President Barack Obama van die Verenigde State van Amerika sal nie teenwoordig wees nie aangesien hy vandag ‘n vredesooreekoms met Iran onderteken na ‘n bloedige oorlog tussen hierdie twee lande. President Robert Mugabe van Zimbabwe wat gister in die land aangekom het, het bekend gemaak dat hy herstel het van sy hart-operasie en dat Malema se inhuldiging vandag hom weer nuwe moed gaan gee om sy land vir nog ‘n termyn te lei. Soos met die inhuldiging van oudpres. Jacob Zuma in 2009, sal die nasionale lugdiens sy kundigheid in formasievlug ten toon stel terwyl Ras Dumisani, die Rastafariër wat in 2010 voor die Springbokke se rugby toets teen Frankryk ’n gemors van die Suid-Afrikaanse volkslied gemaak het, die volkslied saam met Steve Hofmeyr sing. Albei sangers het glo reeds meer as twee maande saam met die groep, Mango Groove geoefen om ‘n herhaling van so ‘n verleentheid te voorkom. Hofmeyr, wat intussen met 'n bruin vrou getroud is, het op sy blog geskerts dat hy, Ras en Malema ná die amptelike plegtigheid saam in die Uniegebou ‘n paar tjops gaan braai.
Pres. Malema sal môre sy kabinet aankondig. Hy is glo slaggereed om sy moue van môre af op te rol vir die werk wat vir sy nuwe regering wag.
©2010 Selwyn Milborrow
No comments:
Post a Comment