Die Mongrels het die Mafias vergewe, maar in die Baai se Northern areas is hul skrikbewind nie vergete. Pang, een van die mees gevreesde bendeleiers van die sewentiger jare is vandag ‘n bekeerde man en ‘n steunpilaar in die gemeenskap. “My broer is ‘n dik ding by ‘n government department,” spog sy Tollos terwyl hy met sy Okapi mes speel. Die meeste bendes het destyds die Okapi gebruik. “Nou hoekom is jy involved in drugs en gangsterism, my broe? Jou broer gaan dit notch en jou laat mang.” sê Tollos. “It’s none of your business, Piepie,” dreig hy en mik na hom. Tollos is vasbeslote om in sy broer se voetspore te volg deur ‘n gevreesde bendeleier te word. Hy ken die geskiedenis van die bendes. Gelvandale, Helenvale en Schauderville was destyds gevaarlike plekke om in te woon. Die First stop in Schauder was die Mongrels se gebied. Die First stop was die eerste busstop in Schauder. Die Mafias en die Mafia Kids se gebied was in Helenvale. Helenvale is in die sewentiger-jare deur die mense herdoop tot Katanga, ‘n stad in Sentraal-Afrika waar geweld ‘n alledaagse verskynsel was.
Baie bende lede is vermoor omdat hulle buite hul gebiede beweeg het. Die Mafias het glo mense in stukkies opgesny en vir die stad se rondloper honde gevoer. Die reёl was dat geen lid van die vyand sonder onderhandelings met die leier van die plaaslike bende buite sy gebied moes besigheid doen nie. Baie het meisies gehad wat in die vyand se kamp gewoon het. Sommige het oorgeloop net sodat hulle met hul meisies kon wees. Die meeste het egter met hul lewe betaal omdat dit verraad was. Die leiers van die Mongrels was egter gentlemen. Hul kode was B13, glo ‘n verwysing na Bungalow 13, ‘n berugte tronksel. Die bekendste figure was Oom Dattie en Dose. Hulle en hul lede het kinders en groot mense gerespekteer. Hulle het nie voor ou mense gevloek nie, en as hulle gevloek het, het hulle verskoning gevra. Hulle het ook nie voor ou mense gerook nie. “Sorry mums en sorry dads,” was hul manier van respek toon.
Vandag se skollies het geen respek vir ou mense en kinders nie. Tollos glo dat hy met niemand moet lag of genade aan betoon nie. Hy was al ‘n paar keer in die tronk en dis waar hy twee moorde gepleeg het as deel van ‘n bende-inisiasie. Daar het hy kennis gemaak met die boek van die Mtsayelo – ‘n boek van die bende-wet wat ‘n sekere bende voorskryf en navolg. Hy ken ook die ou wat in paseli is. In paseli beteken in beheer van bende aktiwiteite in die tronk. Tollos maak sy Okapi toe en kyk na die tyd op sy Rolex. “Piepie, die skool kom nou uit. Ons beter line.” “Ja, kom ons line voor daai taxi ncwata weer jou girl op-chat en van haar ‘n taxi-queen wil maak,” sê Piepie. Hulle vleg roekeloos met Tollos se Merc deur die verkeer in Standfordweg. ‘n Paar motoriste toet sewe keer vir hom as ‘n teken van respek. Hy glimlag deur sy goue tand en wink met ‘n vuurwapen in sy truspieёl na hulle. “Ek wens daai ncwata wil my girl afvry want ek smaak vir ghazi vanaand.” Ghazi is bloed in skollie-taal. Hulle slaan brieke voor die skool. Tollos se girl staan nie soos gewoonlik by die hek en wag nie. Hy kry ‘n skewe glimlag op sy getatoeёrde gesig en kyk na Piepie, “Let the games begin...”
©2010 Selwyn Milborrow
No comments:
Post a Comment